Today was ah sort ah rest day. Ah hit London tuh finish up some editing on ah TV show ah go be on with de rest ah de Warrior Nation, and ah invite de two Daves, cameraman and reporter, tuh de Socapro victory fete tomorrow night.

Dave de reporter want tuh know if dey go have roti dey. He asks Tra..ue Tri.nee, will there be rot-ees there? (rot E)

Ah spend de next 5 minutes trying tuh make him say roti..he finally get it right den say right after “Those rot-ees were delicious.” Oh gard!

Anyway ah get ah raw DVD copy ah part ah de documentary and when ah reach back state side ah go edit it and put it up on Warrior Nation site.

Dem fellas couldn’t stop gaping at dem girls wining last night and dey had a BIG bamsee white ting with blonde hair in front ah we wining..hear Dave de photographer: “Surely she is not Trinidadian?” Ah say yuh see how she wining and jumping..if she eh ah born Trini some Trini man put some Trini in she.

She from West Moorings and she look real good and could wine.

De two Daves only looking and smiling..dey look like Triniman in ah Gym full ah sweaty bare back body builders! Thusty!

Anyways, de two Daves say dey coming tuh de party and dem want tuh come T&T too. Dey filming football fans from all over de world and dem admit today dat we bring another dimension tuh de supporting..de passion mixed with revelry and friendliness.

Dey say we is de best!

Dat make meh day, and after leaving de studio ah went ah do a little shop lifting..errrr ah mean shopping.

Ah go see allyuh later.