Ah get ah call last night, it was Socapro, he say: “yuh get de text ah send yuh? Yuh doh read yuh text messages?”

ah assure de man ah eh even hear de message when it come thru ah mean meh phone eh vibrate or nutten.

~Anyways, he said are you and TWB coming tuh Soca Splash tonight?~

Allyuh, truthfully ah didn’t want tuh go, but as we was representing de Warrior Nation ah say ah going but TWB eh call meh.

Socapro say OK and hang up.

Three minutes later TWB call meh and say he picking me up in ah hour.

Again ah didn’t want tuh go, but dem fellas real cool, so ah get ready and soon ah in TWB super fast mini (de man is ah borse mechanic and does do speciality work on cars eh) an we on de motor way passing everything as we make we way tuh Hackney.

We get lorse, but after consulting a mapbook..TWB had we dey.

We drink something and wait fuh Socapro (De Soca professor) to arrive..as soon as he walk in de door, de man start tuh hand out Warrior Nation flyers, set up an information desk, hang de Warrior nation Banner on de wall, and den hang up ah Trini flag.

De fete was picking up steam now and is like pro know all de BIG bamsee tings in London oui. Ah meet some who come down from Watford to party with de Socapro! Ah even tief ah small wine on one ah dem bamsee, but me eh go lie..when dey play de old swing de engine..swing it all night ah back out saying dat ah have tuh go an hand out flyers.

Ah couldn’t cope, and ah eh shame tuh say so…because if yuh did see de donkey on dis woman..way boy!

Socapro take over de mike, and start tuh jam and de place went wild..de man could DJ and is much respected by de other DJ’s.

He held a raffle and gave away two tickets tuh see de Iceland game..and he run all de Soca Warrior Anthems! De man aint stop bigging up de Warrior Nation at all, at all.

TWB and Socapro is real diehards fellas and ladies. Since I have been here the UK crew as a whole…those ah dem who show up…real represent.

Wearing dey kit, talking to ohers about de club, and planning tuh take Loftus road by storm.

I having a time oui….TWB making sure ah in everything and dat my stay is de best in London yet!

Thanks eh fellas!

Ah going and take ah shower and head down to de Training session and den tuh de Press conference.